Գրանցվել ցանցում Գրանցվել ցանցում Բաժանորդագրվել Բաժանորդագրվել Հյուրերի գիրք Հյուրերի գիրք RSS RSS Կայքի քարտեզը Կայքի քարտեզը Հայերեն English
Կին ձեռներեցները միավորվում են ԶԼՄ-ներ
25/07/2012

Sարբեր ոլորտներում աշխատող 25 կին ձեռներեցներ` Հայաստանի տարբեր մարզերից   ժամանել էին օրերս Ծաղկաձոր ոչ միայն ներկայացնելու իրենց գործունեությունը, այլև քննարկելու  խնդիրները: Եռօրյա այս սեմինարը նախաձեռնել էր Հայաստանի երիտասարդ կանանց ասոցիացիան:
Մասնակիցներից յուրաքանչյուրը  փոքրիկ ցուցադրություն էր կազմակերպել` ներկայացնելով իր արտադրությունը: Տաղավարները շատ տարբեր էին ` հագուստից մինչև էկո սնունդ, խմիչք, հացի արտադրություն, համեմունքներ և քաղցրավենիք: 

Կին ձեռներցների հետ ոլորտի խնդիրները քննարկելու նպատակով հանդիպման էին եկել պետական և միջազգային այն կառույցների ներկայացուցիչները,  որոնք  խրախուսում են փոքր ու միջին բիզնեսը, այդ թվում կանանց տնտեսական մասնակցությունը:  Նրանց թվում էին ՀՀ էկոնոմիկայի նախարարության ՓՄՁ վարչության պետ Արմեն Եգանյանը, ՓՄՁ ԶԱԿ-ի ներկայացուցիչ Կարեն Գևորգյանը, ՄԱԿ-ի փորձագետ Աննա Հարությունյանը, EDMC-ի տնօրեն Մարգարիտա Հակոբջանյանը և փոխտնօրեն Գայանե Դալլաքյանը,  CEED-ի և  Եվրասիա համագործակցության հիմնադրամի ներկայացուցիչներ Գոհար Ղաբուզյանն ու Մարինա Մխիթարյանը, ովքեր ներկայացրեցին իրենց կառույցների գործունեությունը և պատասխանեցին սեմինարի մասնակիցների հարցերին:

Հայաստանի փոքր և միջին  ձեռնարկատիրության զարգացման ազգային կենտրոնը ներկայացրեց պետական աջակցության տարեկան ծրագրերի շրջանակներում իրականացվող «Սկսնակ գործարարների աջակցություն» ծրագիրը: Այն տրամադրում է ուսուցողական, մասնագիտական խորհդատվություն, տեղեկատվական նաև ֆինանսական աջակցություն բիզնես ոլորտում իրենց առաջին քայլերն անողներին:
Իր առաջարկներն ուներ նաև ԱՄՆ ՄԶԳ –ն, որը ներկայացնում է Ձեռնարկությունների զարգացման և շուկայի մրցունակության ծրագիրը: Այն մեկնարկել է անցյալ տարի և ունի թիրախային 4 ոլորտներ, որոնց պատրաստ է աջակցություն տրամադրել: Դրանք են՝ բարձր տեխնոլոգիաներ, զբոսաշրջություն, պտուղ-բանջարեղենի վերամշակում և դեղագործություն:   

Ինչպես նշում է ՀԵԿԱ-ի նախագահ Լիլիթ Ասատրյանը սեմինարի ընթացքում փորձել են  նաև վերհանել այն  խնդիրները, որոնց առավել հաճախ են բախվում կին ձեռներեցները.

-Կարևորագույն խնդիրներից մեկը հարկային օրենսդրությունն է, քանի որ այն  հատկապես  փոքր և միջին ձեռներեցության համար այնքան էլ նպաստավոր չէ: Հաջորդը` վարկային քաղաքականության ոչ բարենպաստ լինելն է: Սկսնակ ձեռներեցների համար բանկերը բավական բարձ տոկոսներ են առաջարկում: Իսկ նոր ռիսկային փուլում գտնվող ձեռներեցի համար միանգամից բարձր տոկոսով վարկ վերցնելը իր վտանգներն է  ստեղծում:
Իր բիզնեսն ընդլայնելու համար նման խնդրի առջև է կանգնած նաև  Ռուզաննա Դանիելյանը: Նա Լոռիից է ժամանել և արդեն 10 տարի է, ինչ ղեկավարում է «Ռուզ-Դան» ՍՊԸ-ն,  որը զբաղվում է հագուստի  արտադրությամբ:
-Ընտանիքիս սոցիալական խնդիրը լուծելու համար, տարիներ առաջ գնեցի ճապոնական կարի մեքենաներ և հիմանդրեցի այս գործը:  Ունեմ պայմանագրային աշխատողներ և պատվերների դեպքում նրանց թիվը անգամ 50-ի է հասել:  Հիմա ինձ անհրաժեշտ է ցածր տոկոսով վարկային գումարներ, որպեսզի կարողանամ հենց արտադրողից կտորը գնել և դրանով ընդլայնել իմ բիզնեսը:
Սեմինարը «Կանանց ձեռներեցության զարգացումը ՀՀ-ում»  ծրագրի մի մասն է կազմում: Այն ՀԵԿԱ-ն իրականցնում է ԱՄՆ դեսպանության աջակցությամբ 2011 թ-ից:  Ծրագրի նպատակն է խրախուսել կանանց ձեռներեցությունը:

Իսկ բիզնես ոլորտում արդեն հաջողությամբ գործող կին ձեռներեցների դրական փորձն առավել տեսանելի դարձնելու, և նրանց միջև փոխհամագործակցությունը սերտացնելու նպատակով ստեղծվել է նաև Կին ձեռներեցների ցանց, որը համակարգում է ՀԵԿԱ-ն: Այն այսօր  200-ից ավելի անդամ ունի, որոնք ներկայացնում են տարբեր չափի, տարբեր ոլորտներում գործող ձեռնարկություններ:
Այս ցանցն, Լիլիթ Ասատրյանի խոսքով,  արդեն իր արդյունքներն է տվել. «Օրինակ, հյուրատունը իր այցեքարտերը,  բուկլետները պատվիրում է ցանցի անդամ հանդիսացող տպարանում, չնայած այս երկու ընկերությունները տարբեր մարզերում են գտնվում: Կամ սննդի վերամշակման  արտադրությամբ զբաղվող ընկերությունը ապրանքը ձեռք է բերում գյուղմթերքների արտադությամբ զբաղվող այն ընկերությունից, ով ցանցի անդամ է»
Լիլիթ Քոչինյան

P.S. Կին ձեռներեցների ցանցի գործունեությանը ծանոթանալու համար  այցելեք
http://businesswoman.am/  կայքը:

ԱՂԲՅՈՒՐ

Իրադարձություններ
ՀայԿար կարի ձեռնարկություն